Дүүргийн Иргэдийн Төлөөлөгчдийн Хурлын IX хуралдаан болж 2014 оны төсвийн тодотголыг хэлэлцэж шийдвэрлэлээ. Хуралдаанд нийт 35 Төлөөлөгч оролцож ирц 90 гаруй хувьтай байсан юм. Хуралдаанд Хурлын нарийн бичгийн дарга бөгөөд Ажлын албаны дарга Ш.Бат-Өлзий дүүргийн Засаг дарга М.Чинболд, Засаг даргын Эдийн засаг, санхүү төлөвлөлтийн асуудал хариуцсан орлогч Р.Дагва, Засаг даргын Хот тохижилтын асуудал хариуцсан орлогч Б.Батдорж, Засаг даргын Тамгын газрын дарга С.Мөнхчулуун болон бусад албаны хүмүүс оролцов.
Хуралдаанаар Төсвийн тухай хуульд заасны дагуу Улсын төсвийн тодотгол, Нийслэлийн төсвийн тодотголтой уялдуулан орон нутгийн төсвийг тодотгосон юм. АН-ын бүлгийн дарга П.Галиндэвийн зүгээс хуралдаанаар хэлэлцэх асуудалд дүүргийн Иргэдийн Төлөөлөгчдийн Хурлын Тэргүүлэгчдийн шинэчлэх асуудлыг оруулах санал гаргасан хэдий ч Төлөөлөгчдийн зүгээс энэ удаад хэлэлцэхгүй гэж үзсэн юм. Хуралдаанд дүүргийн Засаг даргын орлогч Р.Дагва Төсвийн тодотголын төслийг танилцуулж Төлөөлөгчдийн 100 хувийн саналаар баталлаа.